АПОСТОЛ ПАУЛ ШЮШЪХЪУНЫГЪЭ
ЗИІЭХЭУ ЕФЕС КЪАЛЭМ ДЭСХЭМ
ТХЫЛЪЭУ АФИТХЫГЪЭР
АПЭРЭШЪХЬ
ШІуфэс ехыныр
Сэ сы Паул. Тхьэр фэягъэти, Исус Христос иапостолэу* сыхъугъ. Шъо, Тхьэм ицІыф лъапІэхэу, Ефес къалэм* дэсхэу, Исус Христос зыгу илъхэу, ежьым фэшъыпкъэхэм, мы тхылъыр къышъуфэсэтхы.
2Тхьэу Тятэ лъапІэрэ Зиусхьанэу Исус Христосрэ анэшІу къышъущарэфи, гупсэфыныгъэ къышъуарэт.
Христос тыгухэм зэрарылъым пае, гурэ псэрэкІэ Тхьэм ынэшІу къызэрэтщифэрэр
3Тхьэу ти Зиусхьанэу Исус Христос Ятэ щытхъушхор ий. Христос тыгухэм зэрарылъым пае, уашъом епхыгъэу, лъэныкъо пстэумкІи гурэ псэрэкІэ Тхьэм ынэшІу къыт-
1:1 апостол – еплъ Гал. 1:1.
1:1 Ефес къалэр – Асие хэкоу Рим къэралыгъошхом щыщым икъэлэшхоу щытыгъ. А хэкур джырэ Тыркуем итыгъэ къохьапІэ лъэныкъом итыгъ.
щифагъ. 4Сыда пІомэ Тхьэм дунаер къыгъэхъуным ыпэкІэ, Христос тыгухэм зэрарылъымкІэ ежь ибынхэм ащыщ тыхъунэу тыкъыхихыгъ, тыгухэр къабзэхэу, лажьэ зи тимыІэу, шІулъэгъуныгъэ тыгухэм арылъэу ежь ыпашъхьэ тыщыпсэуным пае. 5Исус Христос Іофэу ышІэщтым пае, Тхьэм ежь ибынхэм афэдэу тидэнэу бэшІагъэу тигъэнэфагъ, игъоу зэрилъытагъэм ыкІи ыгу хэлъыгъэм тетэу. 6Арэущтэу зыфишІагъэр ищытхъушхо тетэу ынэшІу къызэрэтщифагъэм пае, тэ щытхъу фэтшІынэу ары. Сыда пІомэ Тхьэм ежь Ыкъоу шІу ылъэгъурэм инэу ынэшІу къытщыригъэфагъ. 7Христос ылъэу къащым щыкІэкІыгъэмкІэ тэ тшъхьэ ыщэфыжьыгъ, типсэкІодхэри къытфигъэгъугъэх Тхьэм ынэшІу щыфэныгъэшхом тетэу. 8ЗэхэшІыкІыныгъэ пстэумрэ гурыІоныгъэ пстэумрэ ягъусэу Тхьэм ынэшІу щыфэныгъэшхор къытэнигъэсыгъ. 9Тхьэм игухэлъ шъэфэу Христос ригъэгъэцэкІэнэу ыухыгъэр игъоу зэрилъытагъэм тетэу къыдгуригъэІуагъ. 10Тхьэм игухэлъэу игъо къызыскІэ ыгъэцэкІэщтыр, уашъохэми чІылъэми щыІэр зэкІэ зы ышІыхэзэ, Христос итетыгъо ыІэчІэгъ чІигъэуцоныр ары.
11Христос тыгухэм зэрарылъым пае, Тхьэм тэри ІэхьышІур къытлъигъэсыгъ. Тхьэм гухэлъэу ыухыгъэм тетэу, а ІэхьышІур къытлъысынэу бэшІагъэу тигъэнэфагъ. Ежьыр ары игухэлърэ зыфаемрэ атетэу Іоф пстэури зыгъэцакІэрэр. 12Тхьэм арэущтэу зыфишІагъэр тэ апэрэхэу Христос щыгугъыхэу, пэплъагъэхэм Тхьэм илъытэныгъэшхо щытхъу фэтшІынэу ары. 13Шъо шъугухэми Христос арылъ хъугъэ. Христос шъугухэм арылъ зыхъугъэр шъыпкъагъэм ехьылІэгъэ къэбарэу, шъумыкІодэу шъукъэзыгъэнэжьырэ къэбарышІур зызэхэшъухыгъэр ары. ХристоскІэ шІошъхъуныгъэ шъуиІэ зэхъум, Тхьэм ежь Ыпсэ ЛъапІэу тыкъызэригъэгугъагъэр мыхъурым* фэдэу шъугухэм къарилъхьагъ. 14Тэ, Тхьэм ицІыфхэу щытхэм, тшъхьэхэр ыщэфыжьхэфэ, ІэхьышІур тэ къызэрэтлъигъэсыщтымкІэ Тхьэм Ыпсэ ЛъапІэ тишэсы*, Тхьэм илъытэныгъэшхо щытхъу фэтшІыным пае.
1:13 мыхъур – арапыбзэкІэ «хъытым», тыркубзэкІи «мыхьыр» зыфаІорэр ары.
1:14 шэсы – зыгорэм ыуасэ щыщэу ыпэкІэ бгъэтІылъырэр ары. ГущыІэм пае, унэ горэ къэпщэфынэу уфаемэ, ыуасэ щыщэу ыпэкІэ бгъэтІылъырэ ахъщэр ары. А бгъэтІылъырэм къегъэшъыпкъэ къанэрэ уасэр зэряптыщтыр.
Паул Тхьэм зэрелъэІурэр
15Арышъ, Зиусхьанэу ИсускІэ шІошъхъуныгъэу шъуиІэмрэ шІулъэгъуныгъэу Тхьэм ицІыф лъапІэхэм афышъуиІэмрэ якъэбар зызэхэсхыгъэм щегъэжьагъэу, 16Тхьэм селъэІу зыхъукІэ, шъуигугъу сэшІы ыкІи шъощ пае Тхьэм щытхъу фэсэшІы зэпыт. 17Ти Зиусхьанэу Исус Христос и Тхьэу, щытхъушхо зиІэ Ты лъапІэм сызэрелъэІурэр, шъо ежьыр нахьышІоу шъушІэным пае, ежь Ыпсэ ЛъапІэу зэхэшІыкІыныгъэ тиІэу зыгъэхъурэри, Тхьэр зыфэдэр къытфэзыгъэнафэрэри шъугухэм къарилъхьанэу ары. 18Шъугухэр къыгъэплъэжьынхэуи Тхьэм селъэІу. Ащ фэдэу сызфелъэІурэр гугъапІэу Тхьэр къызфышъоджагъэр шъушІэнэу ары, ицІыф лъапІэхэм тырягъусэу щытхъушхо зиІэ Іэхьышхоу къытлъигъэсырэри 19шъушІэнэу ары, тэ, шІошъхъуныгъэ зиІэхэм, тыгухэм арылъэу, Тхьэм илъэкІыныгъэшхоу гъунэ зимыІэри шъушІэнэу ары. 20А лъэкІыныгъэшхор зыфэдэр лъэкІыныгъэшхоу Тхьэм Христос лІагъэхэм къызэрахигъэтэджыкІыжьэу, иджабгъукІэ уашъом зэрыщызыгуигъэтІысхьагъэр ары. 21Іэшъхьэтетхэми, тетыгъо зиІэ пстэуми, кІочІэшхо пстэуми, пэщэ пстэуми, мы дунаем имызакъоу къэкІощт дунаеми зигугъу щашІырэ цІэ пстэуми Тхьэм Христос апшъэ ышІыгъ. 22Тхьэм щыІэ пстэури Христос ылъэгу чІэгъ чІигъэуцуи, зэкІэми апшъэ щыІэнэуи, чылыс зэІукІэм ышъхьэу щытынэуи ыгъэнэфагъ. 23Чылыс зэІукІэр Христос ыпкъ фэд. Христосэу тыдэкІи щыІэ пстэуми щыкІагъэ зи ямыІэу, икъугъэу зыгъэхъурэр икъугъэу чылыс зэІукІэм хэлъ.